దేశంలో ప్రజల జీవన ప్రమాణాలు పెరుగుతున్న వేళ చాలా మంది టూవీలర్ల నుంచి కార్లకు మారుతున్నారు. బ్యాంకులు కూడా విరివిగా లోన్స్ ఇవ్వటంతో కారు కొనాలనే కల మధ్యతరగతికి కూడా సాకారం అవుతోంది. చాలా మంది బేసిక్ కార్ మోడళ్లనే కాకుండా రూ.10 లక్షల కంటే విలువైన కార్ మోడళ్లను కొనుగోలు చేస్తున్నారు. అయితే ఇలాంటి వారికి ప్రభుత్వం నుంచి డబ్బు రావాల్సి ఉంటుందని చాలా మందికి అస్సలు తెలియదు. చేతులారా ఈ విషయం తెలియకు తమ డబ్బును తామే కోల్పోతున్నారు.
ఎవరైనా వ్యక్తి రూ.10 లక్షల కంటే విలువైన కారు కొన్నప్పుడు వారికి ప్రభుత్వం నుంచి 1 శాతం టీసీఎస్ సొమ్ము రీఫండ్ రావాల్సి ఉంటుందని ప్రముఖ ఇన్వెస్టర్ ఆశిష్ కుమార్ మెహర్ తన ఎక్స్ పోస్టులో పేర్కొన్నారు. దీనిని కారు కొనేటప్పుడు డీలర్లు వసూలు చేస్తుంటారని చాలా మంది కొనుగోలుదారులకు అసలు ఈ విషయమే తెలియదని, దీనిపై అవగాహన కూడా తక్కువ అని చెప్పారు. పాన్ కార్డుకు ఈ రీఫండ్ లింక్ అయ్యి ఉంటుందని చెప్పారు.
ఊదాహరణకు ఒక వ్యక్తి రూ.10 లక్షల విలువైన కారు కొన్నప్పుడు డీలర్ 1 శాతం టీసీఎస్ అంటే టాక్స్ కలెక్షన్ ఎట్ సోర్స్ వసూలు చేస్తారు. మూలం దగ్గరే పన్ను వసూలు అన్నమాట ఇది. అంటే ఇక్కడ 10 లక్షల రూపాయలు విలువైన కారుకు రూ.10వేలు కట్ చేయబడుతుంది. అయితే ఈ డబ్బు పూర్తిగా తిరిగి క్లెయిమ్ చేసుకునేందుకు అర్హమైనది. దీనిని తిరిగి పొందటానికి కారు కొంటున్న యజమాని డీలర్ వద్ద ఫారం 27డి తీసుకోవాల్సి ఉంటుంది. టాక్స్ ఫైలింగ్ సమయంలో ఫారం 26ఏఎస్ దీనికోసం చెక్ చేయాల్సి ఉంటుంది. ఆ సమయంలో కట్ అయిన టీసీఎస్ సరిచూసుకుని దానిని రీఫండ్ పొందటం లేదా చెల్లించాల్సిన పన్నులో సర్థుబాటు చేసుకోవటం చేయవచ్చు.
Most people in India don’t know this…
— Ashish Kumar Meher (@AshishMeher7) November 28, 2025
but when you buy a new car in India the government actually owes you money back.
Yes, a refund. And it’s already linked to your PAN.
Whenever you buy a car above ₹10 lakh, the dealer collects 1% TCS.
So a ₹10L car → ₹10,000 TCS
A ₹30L…
ఇలా కారు విలువ ఎన్ని లక్షలు పెరిగితే దానిని కొన్న యజమానికి రావాల్సిన రీఫండ్ మెుత్తం కూడా పెరుగుతుందని చాలా మందికి తెలియని విషయం. ఉచితంగా వచ్చే డబ్బును తిరిగి తీసుకోకపోవటం సరైనది కాదు. దేశంలో లగ్జరీ, మిడ్ సెగ్మెంట్ కార్ల కొనుగోలు రోజురోజుకూ పెరుగుతున్న సమయంలో కొనుగోలుదారులు తమ హక్కుల గురించి అవగాహన కలిగి ఉండటం చాలా ముఖ్యం అని మెహర్ అన్నారు.
